作為一部新主機既頭砲, 俾玩家既第一印象好重要. 好彩以 Xbox360 黎講, 其 launch titles 係屬於既多而又唔參次的. 而玩過大概十個鐘既 Call of Duty 2 (以下略 CoD2) 之後, 我發現呢隻 game 有能力從 18 隻 launch titles 中突圍而出, 成為大家出機既一個強大理由．
坊間有關戰爭既第一人稱射擊遊戲多如星數, 我實在覺得不需再重新介紹 CoD2 既背景, 遊戲方法等.. 既然寫既係評論, 不如單刀直入算啦. 不過都要講講呢個, 同其他戰爭 FPS 唔同既係, CoD2 唔係著眼於一個士兵既故事上, 甚至唔係著眼於一個軍隊上. 佢係將三個唔同既戰役串聯埋一齊 (俄軍, 英軍同美軍戰役) 籍此令玩者體會到 WWII 所牽涉到既人同事係有幾龐大.
--- 操控 ---
簡單易用, 以 L trigger 作為武器瞄準/ R trigger 開火既設定確實令到遊戲過程感覺更緊湊同真實. 玩左無耐我就已經被訓練到一見到敵人時, 左手食指立刻按 trigger, 接住唔夠半秒右手食指已經按埋. 拎住把 sniper 槍時按 L 就變左 zoom in, 然後將左冬菇按下就係深呼吸然後沉住氣, 到時旁邊既聲音會 fade out 自己既心跳聲則越來越大. Shoulder buttons 方面 L R 分別係 grenade 同 smoke grenade, 多得 shoulder buttons 既出現, 跑 -> 瞄 -> 射 -> 碇野 -> 射 -> 趁亂撇 呢個動作過程好容易就可以做出. 右冬菇係拎槍柄打近身戰, 通常如果作戰時有人碇左個 smoke grenade 就準備要同人格槍. 同時可以擁有兩把武器, 而且一旦開火, 幾乎每一秒都有人死, 所以根本無須考慮彈藥問題.
遊戲開始有個 training stage 教晒你所有操作. 我記得最後一環係用薯仔練習碇 grenade, 點解薯仔? Game 裡面個軍官話你知: 你知唔知一個 grenade 可能貴過你? 嘿, 咁寸既.. 所以我拎個薯仔向阿 sir 個頭碇去, 呵呵… 原來 game 裡面個物理引擎做得唔錯, 反彈既弧度幾真架.
--- 畫面 ---
係咪有人偷懶? 實際 gameplay 畫面係比 opening 果個 realtime 畫面仲正. Opening 果個唔知係咪因為一早做好而後來無再理, 無左好多 effects 之餘仲好似無 AA! 各位 (esp. snakejoe), 隻 game 係有 AA 的, 我亦唔怪得咁多人悌完預告片對 360 既畫面表示不太驚奇, Infinity Ward 今次累死街坊了…
另外, 自己試過開 720p/ 1080i 玩, 好似分別唔大? 定係自己老花 -___- … 夜少少會影一影兩個 mode 之分別.
UPDATED: 影左相了, 不過可能影得唔清, 大家覺得有明顯分別嘛?
屍體 @ 720p
屍體 @ 1080i
大砲 @ 720p
大砲 @ 1080i
所有多邊形都好圓滑, 好穩定同順. 一個畫面有 50 人混戰唔係問題, 經常有. 而要數多的話, 有一關需要死守一個城, 我企響一座高樓負責用望遠鏡預告敵軍攻勢. 響 360度既可見環境下, 試過有三隊敵軍分別從三個方向黎, 每隊有 >50 人 + 兩三部坦克, 放低望遠鏡悌的話, 會見到好似螞蟻瀾緊.. 但拎番起黎 zoom in 悌又可以見到 detail 位例如講野個口郁咁, 總之畫面唔使擔心就係啦.
講多D detail 野, 用 sniper 槍 headshot 敵人會見到濺血同頭盔被打飛響空中不斷轉, 呢個真係悌極唔厭. 我仲有個實際例子, 有一關個副題叫 “Pipelines”, 原來係我軍派左我同另外幾人負責爬果 D 架空既鐵管, 然後響途中探察敵軍陣勢. 原本應該一味爬就可以, 我又多手從鐵管缺口向樓下開拖. 結果一陣騷亂中再望番條管, 本身黑瑪瑪的… 一下子多左好多湰, 而每開一個湰就可以見到一絲光線從外透入 (強光, 即係見到有塵飄果隻)... 好正, 最重要係呢個並唔係 sequenced , 係可以完全唔出現的. 當然, 管裡面最後多左堆屍體 -___- 好彩隻 game 又未醒目到當成 friendly fire 入我數.
讚夠喇, 等我雞蛋裡挑骨頭吧… 背景大多數無得自己破壞, 即係話隻 game 可以做到一架坦克追住你開火時將建築物打爛, 但同時你想開槍打爆一盞油燈卻唔得… 另外, 發現到響碇完 smoke grenade 情況下, 人物有時候會變左一整個灰色物體, 即係既唔立體又無層次咁, 不過係好個別既例子姐.
--- 聲效 ---
利害, 我其實唔理佢將支 tommygun 或者 M40 既開火聲音做得有幾似當年支真炮.. 不過我第一次可以聽聲分辨出唔同槍, 即係分到唔同兵種啦, 感覺幾特別. 大部分時間係無配樂的, 但一D特別場面先出現配樂呢個設計好似額外有氣氛. 況且得閑可以聽聽隊友對話, 唔係經常重複的.
--- Gameplay ---
最出色 (我見) 其實係呢環, 因為拜強大機能允許, 製作小組安排左好多有助玩家投入既設計. 本來以為呢類遊戲不論係故事, 人物或者路線都會係平鋪直敘, 但 CoD2 有時俾玩家自己決定任務先後次序, 路線亦都多變化. 如果花多少時間去搵一棟大廈既地牢入口, 就可以同隊友配合裡外夾攻屋內敵人. 重點係自己有多 d 決定權. CoD2 絕對唔係貼上戰爭 skin 既典型 FPS, 英雄主義 --- 捻都唔駛捻, 你只要見一個殺一個就已經幫緊大忙. 當然有大量同僚亦唔代表可以 camp 響一二邊等清場 (而且你俾 $60 美金買隻 game, 然後一味 camp 唔通怕整污糟 ABXY 制?). 雖然唔可能話好似同緊真人 co-op 緊一樣, 但個 AI 已經足以令我覺得係附屬於呢個軍隊既小組裡面, 身為大戰場上既一只棋既感覺, 因為互動方面做得好足.
再講講變化呢樣, 記得以前玩 Medal of Honor, 雖然版圖悌落好大好自由, 但狡詐既製作者成功用一 d “方法” 令玩家既遊戲路線個個一樣… 例如安排地雷陣, 一 d 唔可能過到既機槍排等等.. 點都要等時機 (i.e. 等 sequence) 等人地點條路你行, 否則慘死. 呢 d 情況響 CoD2 裡面改善不少, 真正既可以四圍闖喇. 大家都兜後巷你想走大街, 無問題… 亦都唔會一定死, 有 d 技術的話係得的. 不過! 請記得你咁樣選擇等於拎晒自己小隊既士兵條命去博, 佢地會跟住你的. 仲記得我如何響條鐵管裡面累死全家嘛?
*** 總括 ***
講到尾, CoD2 實在係好, 但唔係好在佢有什麼”驚世首創元素”, 而係好在佢將好多其他戰爭 fps 企圖做出黎既野真正成功地表現俾玩者. 相信好多曾製作其他同類遊戲既製作者見到呢隻 game 都會話: 嗯, 我當年都係好想將呢樣野做到出黎的! 例子除左之前提過既死守小城, 百幾二百人圍攻之外, 仲有例如 sniper 攻防戰, 士兵 + 坦克 + 飛機空襲同時混戰既場面.
個人最 buy 既, 多得 360 恐怖機能, 係投入感. 同隊友響一座爛大廈裡面講野, 突然其中一個俾離好遠大廈既 sniper 打死. 大家立刻搵訂厘同搵出對手位置, 經過討論之後決定要引佢出手繼而暴露藏身地點. 我望住隊友將自己頭盔除下, 放響支槍頭上再慢慢伸出去… 頭盔立刻應聲被打飛, 然後隊友大喊: 左邊紅色大廈三樓!
係.. 呢d 斷估都知道係事先安排好既, 但由於同時亦不乏互動元素, 令我有足夠自由發揮空間.
最有滿足感係當做好整個任務既大部分之後, 通常最後一 part 就係 “Meet up and Rendezvous with team” 即係同你講敵軍大勢已去, 快 d 同自軍連消帶打一鼓作氣將敵人徹底趕走! 眼見敵軍由開頭一波接一波既攻勢, 到最後夾住尾巴四散, 自己則同隊友一路跑一路鬧/ 歡呼, 此時澎拜音樂響起…
基本上 CoD2 成功收集其他 WWII 遊戲企圖想表現出黎但又差少少既野 (包括 CoD1), 然後有效率地實行, 所出黎既產物就係一個終於可以令玩者置身其中既戰爭經驗. 仲要係截然不同既三個戰役, 感覺完全唔同 (響英軍戰役中 TK “teamkill”, 警告係 “Friendly Fire Will Not Be Tolerated!”, 響俄軍戰役中做同樣事情會被罵係叛國賊 -___-). CoD2 作為 launch title 實在最好不過, 成功介定 360 從現今主機相比跨出既一步, 原來係咁鬼大步.
--- 後記 ---
講咁耐都仲未提 online play! 只試過一次, 我始終覺得寧願犧牲最大遊玩人數, 都絕唔容許 lagging 出現. 咁樣做其實都係為安全計, 當然亦唔排除未來會有更新 patch 改善. 模式唔夠呢個卻係現實… 連co-op play 都冇, 就算靠你賣多兩部機都賣唔到兩個 LIVE starter pack 啦! 浪費浪費…
